Jamia Madinatul Uloom - An abode for the righteous

جامعہ مدینۃالعلوم ایک تعارف رئیس الاتقیا حضور جلالۃ الارشاد سرکار نمازی علیہ الرحمہ نے ١٩٧٣ ء میں ضلع مظفر پور کی ایک کوردہ غیر متعارف پہکولی نامی بستی میں خلق کی روحانی تازگی وجلائے قلب کے لیے خانقاہ کی بنیاد ڈالی اور تین سال کے بعد وقت کے اہم تقاضوں کی تکمیل کے لیے یکم محرم الحرام ١٣٩٦ھ مطابق ٣/جنوری ١٩٧٦ ء کو خانقاہ سے متصل جامعہ مدینۃالعلوم کے قیام کی تحریک سینۂ زمین پر مجسم بن کر اتر گئی .جلالۃالارشاد علیہ الرحمہ کا فیضان نظر تھا، فعال اراکین واساتذہ کی بے لوث کاوش تھی کہ آنًا فانًا علوم ومعارف کا شہر آباد ہو گیا اور اس بنجر زمین سے شریعت وطریقت کا ایسا چشمۂ سیال جاری ہوا کہ تشنگان علم ومعرفت کی توجہ کا مرکز بن گیا.خودرو پودوں اور قد آور درختوں کےاگنےکی جگہ علم وادب کی کلیاں مسکرا اٹھیں جہاں فکرو نظر کی اصلاح بھی ہوتی رہی اور تزکیہ نفس بھی ہوتا رہا.قلیل عرصہ میں انفرادیت کا حامل سلسلہ تیغیہ کا نمائندہ اور مسلک اعلیٰ حضرت کا ترجمان یہ ادارہ شہرت و کامیابی کی بلند منزلوں سے ہمکنار ہوگیا.شمالی بہار کے کوائف سے متعارف لوگوں پر پوشیدہ نہیں کہ یہاں نور طرح طرح کی ظلمتوں سے متصادم رہتا ہے.مگر بحمدہٖ تعالیٰ اس مثالی درس گاہ نے دجل وعناد اور ظلم وجبر کی شب دیجور میں بھی حق وصداقت اور محبت و مؤدت کی قندیل کو روشن رکھا جس کا ثمرہ ہے کہ مذہب مہذب کا یہ عظیم الشان قلعہ تعلیمی، تنظیمی اور تعمیری تمام شعبوں میں اپنی مثال آپ ہے.