Full Bright Public School, Shahabad, Rampur

FULL BRIGHT PUBLIC SCHOOL ka qiyaam:-
Taaleem ki ehmiyat dunya main insanon ke wujud ke baad se hi se hamaisha musallam rahi hai. Har daur main iski ehmiyat ko mehsoos kya gya aur tamam mazhab ne iski ehmiyat ko tasleem kiya hai. Khud hamare nabi Mohammad(saw) par Jo pehli wahi nazil hui thi woh padhne aur ilm ko seekhne aur sikhane se muta'alliq thi. Jab tak Musalman taalim se wabasta rahe taraqqi wa sar bulandi unki qadam choomti rahi, aur jab unki nigaahon main taalim ki ehmiyat kam ho gyi, aur unhone zindagi ke is buniyadi kaam se munh modh liya to tanazzuli aur inhitaat unka muqaddar ban gyi. Bhut afsos ka maqam hai ke aaj hamare is mulk Hindustan main taaleemi wa taraqqi ke maidan main musalmanon ki haalat daliton se aur pasmandah tabqaat se bhi badtar hai. Tamam ashab-e-fikr wa Danish ka is baat pr ittifaaq hai ke aaj ummat ko islami uloom ke maahir ulama-e-kiraam ke saath saath zindagi ke tamam maidanon ke maahireen ki sakht zarurat hai. Ummat ko tafseer, Fiqah, Adab ke maahir aur dawat ke maidan main kaam karne wale duaa ila llah ke saath ache Doctors, ba salahiyat engineers, expert economics, maahireen-e-siyasat, maahireen-e-tijarat aur aala muntazimeen ki bhi skakht zarurat hai. Zindagi ke tamam maidanon ke maahireen tayyar kiye baghair is ummat ko taraqqi wa sar bulandi se hamkinaar karna mumkin nhi hai. Aaj akhalque wa kirdaar ke zawal ki wajah se muashrah ki badtareen surat-e-haal hame dawat-e-fikr de rahi hai ke ham nayi nasl ki Dunyawi taalim ke saath unhe ek acha insaan aur zimmedar shehri banane ke liye sanjeedgi ke saath kaam kren, taake hamare bachche bade ho kar padh likh kar jab maidan-e-amal main ayen to unki Dunyawi khush haali ke saath unke umdah akhlaq wa kirdar, muashrey ki falah ke liye unki fikr mandi aur insaaniyat ki bhalai ke liye unki koshishon ko daikh kar hamari aankhen thandi hon.